Sincerely, Keta

ქეთა ბაღაშვილი

მთავარი

 

IMG_7829

რა უცნაურია, რომ ვიღაც ჩვენზე ამბებს დაატარებს. აი, მაგალითად, ვიღაცამ იცის, ახალგაღიძებულმაც კი ზეპირად იცის, ფორთოხალი უფრო გიყვარს თუ-კივი, ან კარაქზე თაფლის ნაცვლად ჯემს რატომ უსვამ. ვიღაცამ იცის, ბრინჯს რომ მაკარონი გირჩევნია და რომ ბოსტნეულის ჭამას სულ გაძალებდნენ. იცის, რომ სტაფილოსფერ პერანგს არასდროს ჩაიცვამ, მაგრამ შარშან ვარდისფერზეც ასე ამბობდი. ვიღაცამ იცის, რომ სიტყვა “ნახვამდის” ნაცვლად მხოლოდ “დროებითს” ამბობ. ვიღაცამ იცის შენი ბავშვობის ისტორიები, ისეთები, რომ არ შესწრებია, მაგრამ შენგან მოსმენილი კარგად ახსოვს და ახლა ისე დაატარებს შენს მოგონებებს, თითქოს, რამე უფლება ჰქონდეს, თითქოს, ეკუთვნოდეს.
დადის და დაატარებს შენს ამბებს ისე, თითქოს, წიგნის დაწერას აპირებდეს, თითქოს, ფილმს იღებდეს, თითქოს მიკროფონში ყვიროდეს. დადის, დაატარებს შენს ამბებს და საერთოდ არ კითხულობს, ამის უფლება თუ აქვს.